ಪಿಸುಮಾತು ®

ಜಾಲತಾಣಗಳ ಬಗ್ಗೆ ಒಂದಿಷ್ಟು ಮಾಹಿತಿ

2012-02-02T10:28:00.001+05:30

ಜಾಲತಾಣ (website) ಅಂದರೆ ಎಲ್ಲರಿಗೂ ಗೊತ್ತು. ಆದರೆ ಅದು ಹೇಗೆ ಕೆಲಸ ನಿರ್ವಹಿಸುತ್ತದೆ ಎಂದು ಎಲ್ಲರಿಗೂ ಪೂರ್ತಿಯಾಗಿ ತಿಳಿದಿರಲಿಕ್ಕಿಲ್ಲ. ನಿಮಗೊಂದು ಜಾಲತಾಣದ ಅಗತ್ಯ ಇದೆ ಎಂದಾದಲ್ಲಿ ಅದರ ಬಗ್ಗೆ ಸ್ವಲ್ಪ ಮಾಹಿತಿ ಪಡೆದುಕೊಳ್ಳುವುದು ಉತ್ತಮ.

ಏನಿದು ಜಾಲತಾಣ ?

ಅಂತರ್ಜಾಲದಲ್ಲಿ ನಿರ್ದಿಷ್ಟ ಹೆಸರಿನೊಂದಿಗೆ ಗುರುತಿಸಿಕೊಂಡು ನಿಮ್ಮ / ಸಂಸ್ಥೆಯ / ಅಥವಾ ಯಾವುದೇ ಮಾಹಿತಿಯನ್ನು ಶೇಖರಿಸಿಟ್ಟುಕೊಂಡು ಆ ವಿಳಾಸದಲ್ಲಿ ಬಂದವರಿಗೆ ಅದನ್ನು ತೋರಿಸುವುದೇ ಜಾಲತಾಣ. ಹೀಗೆ ಹೇಳಿದರೆ ಅಷ್ಟಾಗಿ ಅರ್ಥ ಆಗಲಿಕ್ಕಿಲ್ಲ. ಸ್ವಲ್ಪ ವಿವರಿಸಬೇಕಾಗಬಹುದು.

ಜಾಲತಾಣವು ಕಾರ್ಯ ನಿರ್ವಹಿಸುವುದು URL ( uniform resource locator or universal resource locator ) ವಿಳಾಸದ ಆಧಾರದಲ್ಲಿ. ಅಂದರೆ ನೀವು ಒಂದು ನಿರ್ಧಿಷ್ಟ ಜಾಲತಾಣಕ್ಕೆ ಹೋಗಬೇಕಾದರೆ ನಿಮ್ಮ ಬ್ರೌಸರ್‌ನ ವಿಳಾಸದ ಪಟ್ಟಿಯಲ್ಲಿ ನಿಮಗೆ ಬೇಕಾದ URL (ವಿಳಾಸ) ಹಾಕಲೇಬೇಕು. [ ಉದಾ : ಈ ಬ್ಲಾಗ್‌ನ URL ಹೀಗಿದೆ : www.pisumathu4u.blogspot.in ]. ಅಂದರೆ ಪ್ರತಿಯೊಂದು ತಾಣಕ್ಕೂ ಒಂದೊಂದು ವಿಳಾಸ ಇರುತ್ತದೆ. ವಿಳಾಸ ತಪ್ಪಾದರೆ ನೀಮಗೆ ಬೇಕಾದ ತಾಣ ಸಿಗದೇ ಬೇರೆ ತಾಣಕ್ಕೆ ಹೋಗಿರುತ್ತೀರಿ. ಅಥವಾ Not Found ಸಂದೇಶ ಬರುತ್ತದೆ. ಅಂದರೆ ಒಂದು ಅಂಚೆ ಪತ್ರವನ್ನು ಸರಿಯಾದ ಸ್ಥಳಕ್ಕೆ ತಲುಪಿಸಲು ಹೇಗೆ ವಿಳಾಸ ಮುಖ್ಯವೋ ಹಾಗೆಯೇ ನಮಗೆ ಬೇಕಾದ ಜಾಲತಾಣವನ್ನು ತಲುಪಲು ಸರಿಯಾದ URL ಮುಖ್ಯ.

ಒಂದು ವಿಳಾಸವನ್ನು ವಿಳಾಸದ ಪಟ್ಟಿಯಲ್ಲಿ ನಮೂದಿಸಿ Enter ಮಾಡಿದಾಗ ನಮ್ಮ ಬ್ರೌಸರ್‌ನಲ್ಲಿ ಆ ವಿಳಾಸದಲ್ಲಿರುವ ಪುಟ ತೆರೆದುಕೊಳ್ಳುತ್ತದೆ. ನಿಮ್ಮದೇ ಒಂದು ಜಾಲತಾಣ ಬೇಕು ಎಂದಾದಲ್ಲಿ ನಿಮ್ಮದೇ ಆದ ಒಂದು ವಿಳಾಸ ಬೇಕು. ಅರ್ಥಾತ್ ಆ ವಿಳಾಸದ ಮಾಲೀಕತ್ವವನ್ನು ನೀವು ಪಡೆಯಬೇಕು. ಅದನ್ನು ಡೊಮೈನ್ ಎಂದು ಹೇಳುತ್ತಾರೆ. ಅಂದರೆ ಒಂದು ಡೊಮೈನ್ ಹೆಸರನ್ನು ನೀವು ನೋಂದಾಯಿಸಿದರೆ ಅದು ಪ್ರಪಂಚದಾಧ್ಯಂತೆ ನಿಮ್ಮದೇ ಆಗುತ್ತದೆ. ಅಂದರೆ ಅದೇ ಹೆಸರನ್ನು ಬೇರೆ ಯಾವ ದೇಶದಲ್ಲಿಯೂ ಯಾರೂ ಪಡೆಯಲು ಸಾಧ್ಯವಿಲ್ಲ.

ಡೊಮೈನ್ ಹೆಸರುಗಳು

ಇದರಲ್ಲಿ ಒಟ್ಟು ಮೂರು ಭಾಗಗಳಿರುತ್ತವೆ. ಉದಾ : http://www.pisumathu.com ಅನ್ನು ತೆಗೆದುಕೊಂಡರೆ ...

http://www = ಆರಂಭಿಕ ಭಾಗ. ಜಾಲತಾಣದ ಪ್ರಮುಖ ಅಂಗ.

.pisumathu = ಜಾಲತಾಣದ ಹೆಸರು

.com = ಎಕ್ಸ್‌ಟೆನ್ಷನ್

http://www = ಇದರಲ್ಲಿ http ಅಂದರೆ Hyper Text Transfer Protocol ಎಂದರ್ಥ. ಹಾಗೆಯೇ www ಎಂದರೆ World Wide Web. ಇವೆರಡೂ ಸೇರಿ ಪ್ರಪಂಚದಾಧ್ಯಂತ ಇರುವ ಜಾಲತಾಣಗಳನ್ನು ಹುಡುಕಿ ಕೊಡುತ್ತವೆ.

ಎರಡನೇ ಭಾಗ ನಮ್ಮ ತಾಣದ ಹೆಸರು. ಅದು ನಿಮಗೆ ಇಷ್ಟ ಬಂದಿದ್ದನ್ನು ಆಯ್ಕೆ ಮಾಡಿಕೊಳ್ಳಬಹುದು.

ಮೂರನೇ ಭಾಗ .com. ಇದನ್ನು ಎಕ್ಸ್‌ಟೆನ್ಷನ್‌ ಎಂದು ಹೇಳುತ್ತಾರೆ. ಈ ಎಕ್ಸ್‌ಟೆನ್ಷನ್‌ಗಳು ತುಂಬಾ ಇವೆ. ಯಾವುದನ್ನು ಬೇಕಾದರೂ ನೀವು ಆಯ್ಕೆ ಮಾಡಿಕೊಳ್ಳಬಹುದು.

ಉದಾ :
.com = commercial

.in = india

.co.in = commercial india

.net = internet

ಹೀಗೆ ಹಲವಾರು ಎಕ್ಸ್‌ಟೆನ್ಷನ್‌ಗಳಿವೆ. ಇದರಲ್ಲಿ .com ಹೆಚ್ಚು ಪ್ರಚಲಿತವಾಗಿದೆ.

ನೋಂದಾಯಿಸುವುದು ಹೇಗೆ ?

ನಿಮಗೆ ಒಂದು ಜಾಲತಾಣ ಅಗತ್ಯವಿದ್ದರೆ ಮೊದಲಿಗೆ ಯಾವ ಹೆಸರಿನಲ್ಲಿ ನೋಂದಾಯಿಸುವುದು ಎನ್ನುವುದನ್ನು ತೀರ್ಮಾನ ಮಾಡಿಕೊಳ್ಳಿ. ಆದರೆ ನಿಮಗೆ ಬೇಕಾದ ಹೆಸರೇ ಸಿಕ್ಕಿ ಹೋಗುತ್ತದೆ ಎಂದು ಹೇಳಲಾಗದು. ಯಾಕೆಂದರೆ ಅದೇ ಹೆಸರಿನಲ್ಲಿ ಪ್ರಪಂಚದಾಧ್ಯಂತ ಬೇರೆ ಯಾರಾದರೂ ಹೆಸರು ನೋಂದಾಯಿಸಿದ್ದರೆ ಯಾವ ಕಾರಣಕ್ಕೂ ನಿಮಗದು ದೊರೆಯುವುದಿಲ್ಲ. ಉದಾ : ನಿಮಗೆ manju.com ಹೆಸರಿನ ಡೊಮೈನ್ ಬೇಕಾಗಿದ್ದು ಅದನ್ನು ನೋಂದಾಯಿಸಲು ಯತ್ನಿಸಿದರೆ ಕಂಡಿತಾ ಅದು ದೊರೆಯುವುದಿಲ್ಲ. ( http://www.pisumathu.com/ ಇಲ್ಲಿ ಹೋಗಿ ಪರಿಶೀಲಿಸಿ ನೋಡಿ ) ಏಕೆಂದರೆ ಅದನ್ನು ಈಗಾಗಲೇ ಯಾರೋ ನೋಂದಾಯಿಸಿಕೊಂಡಿದ್ದಾರೆ. ಆಗ ನೀವು ನಿಮಗೆ ಬೇಕಾದ ಹೆಸರಿನಲ್ಲಿ ಕೊಂಚ ಮಾರ್ಪಾಡು ಮಾಡಿಕೊಳ್ಳಲೇ ಬೇಕು. ಉದಾ : manjuwriter.com. ಅಥವಾ ಎಕ್ಸ್‌ಟೆನ್ಷನ್‌ಗಳನ್ನಾದರೂ ಬದಲಾಯಿಸಿ ಸಿಗುತ್ತದಾ ನೋಡಬೇಕು. .com ಸಿಗದಿದ್ದಲ್ಲಿ .co.in / .in / .net ಹೀಗೆ ಯಾವುದಾದರೊಂದು ದೊರೆಯಬಹುದು. ಈ ನೋಂದಾಯಿಸುವಿಕೆಯನ್ನು ನೋಡಿಕೊಳ್ಳುವುದು ICANN ( Internet Corporation for Assigned Names and Numbers ) ಎಂಬ ಅಂತರಾಷ್ಟ್ರೀಯ ಸಂಸ್ಥೆ. ಆದರೆ ಇದು ನೇರವಾಗಿ ನಿಮಗೆ ಡೊಮೈನ್ ನೋಂದಾಯಿಸಿ ಕೊಡುವುದಿಲ್ಲ. ಅದಕ್ಕೆ ನೀವು ಅನುಮತಿ ಪಡೆದಿರುವ ಇತರೆ ಸಂಸ್ಥೆಗಳನ್ನು ಸಂಪರ್ಕಿಸಬೇಕು. ಈ ವ್ಯವಹಾರದಲ್ಲಿ godaddy.com ಪ್ರಪಂಚದಲ್ಲೆ ನಂ 1 ಆಗಿದೆ. ಅದರಂತೆಯೇ ಹಲವಾರು ಸಂಸ್ಥೆಗಳಿದ್ದು ನನ್ನದೇ ಆದ http://www.pisumathu.com ಸಹ ಇವುಗಳಲ್ಲಿ ಒಂದಾಗಿದೆ. ಇಲ್ಲಿ ನೀವು ನಿಮಗೆ ಬೇಕಾದ ಹೆಸರನ್ನು ಹುಡುಕಿ ನಿಮ್ಮ ಹೆಸರಲ್ಲಿ ನೋಂದಾಯಿಸಿಕೊಳ್ಳಬಹುದು. ನೀವು ಆ ಸಮಯದಲ್ಲಿ ನೀಡುವ ಮಿನ್ನಂಚೆ (E-mail) ವಿಳಾಸವನ್ನೇ ಮಾಲೀಕತ್ವ ನಿರೂಪಣೆಗೆ ಪರಿಗಣಿಸಲಾಗುತ್ತದೆ.

ಹೆಸರು ನೋಂದಾಯಿಸಿದ ನಂತರ ?

ಹೆಸರು ನೋಂದಾಯಿಸಿದ ನಂತರ ಅಷ್ಟಕ್ಕೇ ಕೆಲಸ ಮುಗಿದು ಹೋಗಲಿಲ್ಲ. ನಿಮ್ಮ ಜಾಲತಾಣದ ಪುಟಗಳನ್ನು ವಿನ್ಯಾಸ ಮಾಡಬೇಕಾಗುತ್ತದೆ. ಅದರಲ್ಲಿ ನಿಮ್ಮ/ಸಂಸ್ಥೆಯ ಎಲ್ಲಾ ಮಾಹಿತಿ, ಚಿತ್ರಗಳು, ವಿಡಿಯೋ ಮುಂತಾದುವನ್ನು ಹಾಕಬಹುದು. ಇದನ್ನು ನುರಿತ ವೆಬ್‌ ಡಿಸೈನರ‍್ ಗಳಿಂದ ಮಾಡಿಸಬೇಕು. ಹೀಗೆ ವಿನ್ಯಾಸಗೊಳಿಸಿದ ಪುಟಗಳನ್ನು ಒಂದು ನಿರ್ದಿಷ್ಟ ಸ್ಥಳದಲ್ಲಿ ಇರಿಸಿದರೆ ಮಾತ್ರ ಪ್ರಪಂಚದಾಧ್ಯಂತ ನಿಮ್ಮ ವಿಳಾಸ ಹುಡುಕುವ ಜನರಿಗೆ ಅವು ತೆರೆದುಕೊಳ್ಳಲು ಸಾಧ್ಯ. ಆ ಸ್ಥಳವನ್ನೇ Hosting ಎನ್ನುತ್ತಾರೆ. ಇದನ್ನೂ ಒದಗಿಸುವ ಹಲವಾರು ಸಂಸ್ಥೆಗಳಿದ್ದು http://www.pisumathu.com ಸಹ ಇದೀಗ ಈ ಕಾರ್ಯ ಮಾಡುತ್ತಿದೆ. ಇಲ್ಲಿ ನೀವು ನಿಗದಿ ಪಡಿಸಿದ ದರವನ್ನು ನೀಡಿ ಸ್ಥಳವನ್ನು ಪಡೆದು ನಿಮ್ಮ ಪುಟಗಳನ್ನು host ಮಾಡಿದರೆ ಅಲ್ಲಿಗೆ ನಿಮ್ಮ ಜಾಲತಾಣ ಸಂಪೂರ್ಣವಾದಂತೆ. ಪ್ರಪಂಚದ ಯಾವುದೇ ಭಾಗದಲ್ಲೂ ಅದು ತೆರೆದುಕೊಳ್ಳುತ್ತದೆ.

ಸೇವೆಯ ಬಗ್ಗೆ

ನಿಮಗೆ ಈ ಕ್ಷೇತ್ರದ ಬಗ್ಗೆ ಅಷ್ಟಾಗಿ ತಿಳಿದಿಲ್ಲದಿದ್ದರೆ ಏಕಾಏಕೀ ಯಾವುದೋ offer ಮಳೆಗೆ ತುತ್ತಾಗಬೇಡಿ. ಗೂಗಲ್‌ನಲ್ಲಿ ಹುಡುಕಿದಾಗ ಅತಿ ಕಡಿಮೆ ದರದಲ್ಲಿ ಜಾಲತಾಣಗಳನ್ನು ನಿರ್ಮಿಸುತ್ತೇವೆ ಎಂದು ಹಲವಾರು ಸಂಸ್ಥೆಗಳು ಹೇಳಿಕೊಂಡಿರುವುದನ್ನು ಕಾಣಬಹುದು. ಅವುಗಳಿಗೆ ಮರುಳಾದರೆ ಮುಂದೆ ತೊಂದರೆ ಎದುರಾಗಬಹುದು. ಹಾಗೂ ದರಗಳ ಬಗ್ಗೆ ಮೊದಲು ಒಂದು ಮೊತ್ತವನ್ನು ತಿಳಿಸಿ ಅವರಿಗೆ ಅದನ್ನು ಪಾವತಿಸಿದ ನಂತರ ಇನ್ನೊಂದಕ್ಕೆ ಹೆಚ್ಚಿನ ದರವನ್ನು ತಿಳಿಸುವುದೂ ಇದೆ. ಒಂದು ಜಾಲತಾಣಕ್ಕೆ ನೀವು ಮೂರು ವಿಭಾಗಕ್ಕೆ ಹಣವನ್ನು ನೀಡಬೇಕಾಗುತ್ತದೆ.
೧. ಡೊಮೈನ್ ನೋಂದಾಯಿಸುವಿಕೆ
೨. ಪುಟ ವಿನ್ಯಾಸ
೩. ಹಾಸ್ಟಿಂಗ್

ಕೆಲವು ಸಂಸ್ಥೆಗಳು ಮೊದಲಿನ ಡೊಮೈನ್ ನೋಂದಾಯಿಸುವಿಕೆಗೆ ಅತಿ ಕಡಿಮೆ ದರ ತೋರಿಸಿ ಉಳಿದ ಎರಡರಲ್ಲಿ ಹೆಚ್ಚು ಪೀಕುತ್ತವೆ. ಇಂತಹ ಸಂದರ್ಭಗಳಲ್ಲಿ ಎಚ್ಚರಿಕೆ ವಹಿಸಬೇಕು. ಕೆಲವು ಸಂಸ್ಥೆಗಳ ಹಾಸ್ಟಿಂಗ್ ಸರ್ವರ‍್ ಕಳಪೆ / ಹಳೆಯದಾಗಿದ್ದರೆ ತೊಂದರೆ ತಪ್ಪಿದ್ದಲ್ಲ. ಅಂತಹ ಸಮಯದಲ್ಲಿ ನಿಮ್ಮ ಜಾಲತಾಣ ಸರಿಯಾಗಿ ತೆರೆದುಕೊಳ್ಳದಿರಬಹುದು, ತುಂಬಾ ನಿಧಾನವಾಗಿ ತೆರೆದುಕೊಳ್ಳಬಹುದು. ಒಮ್ಮಗೇ ಹಲವಾರು ವೀಕ್ಷಕರು ಬೇರೆ ಬೇರೆ ಕಡೆ ತೆರೆದರೆ ಜಾಮ್ ಆಗಬಹುದು. ಹಾಗಾಗಿ ಈ ವಿಷಯದಲ್ಲಿ ದರ ಸಮರಕ್ಕೆ ಮರುಳಾಗಬೇಡಿ. ಇನ್ನೊಂದು ಪ್ರಮುಖ ವಿಷಯವೆಂದರೆ ಡೊಮೈನ್ ನೋಂದಾಯಿಸುವಿಕೆ ಮತ್ತು ಹಾಸ್ಟಿಂಗ್ ದರಗಳು ಒಂದು ವರ್ಷಕ್ಕೆ ಸೀಮಿತವಾಗಿರುತ್ತವೆ. ಇವುಗಳನ್ನು ಪ್ರತಿ ವರ್ಷ ನವೀಕರಣ ಮಾಡಿಸಬೇಕು. ಆದರೆ ಪುಟ ವಿನ್ಯಾಸ ಒಮ್ಮೆ ಮಾಡಿಸಿದರೆ ಸಾಕು. ಅಥವಾ ಇದರಲ್ಲಿ ನಿಮಗೆ ಏನಾದರೂ ಬದಲಾವಣೆ ಬೇಕಾದಲ್ಲಿ ಮಾರ್ಪಡಿಸಬಹುದು.

ಪತ್ತೇದಾರಿ ಕಥೆ ಬರೆವ ರಹಸ್ಯ

2012-01-31T12:29:00.001+05:30

ಪ್ರಾರಂಭ ಹೇಗಿರಬೇಕು ?

ಸಾಧಾರಣ, ಸಾಮಾಜಿಕ ಕಥೆ ಬರೆಯುವುದು ಸುಲಭ. ಆದರೆ ಒಂದು ಪತ್ತೇದಾರಿ ಕಥೆ ಬರೆಯುವುದು ತುಂಬಾ ಕಷ್ಟ. ಸಾಮಾಜಿಕ ಕಥೆ ಬರೆಯಲು ನೂರಾರು ವಿಷಯಗಳು ಸಿಗುತ್ತವೆ. ಅವುಗಳನ್ನು ಎಲ್ಲಿಂದ ಹೇಗೆ ಬೇಕಾದರೂ ಪ್ರಾರಂಭಿಸಬಹುದು. ಹೇಗೆ ಬೇಕಾದರೂ ಮುಕ್ತಾಯ ಮಾಡಬಹುದು. ಇಂತದ್ದೇ ಅನ್ನುವಂತಹ ಅಂತ್ಯ ಕಾಣಿಸುವ ಅಗತ್ಯ ಇರುವುದಿಲ್ಲ. ಮೇಲಾಗಿ ಬರವಣಿಗೆಯ ಶೈಲಿ ಅಷ್ಟೇನೂ ಉತ್ತಮವಾಗಿರದಿದ್ದರೂ ನಡೆದೀತು, ಒಂದು ಉತ್ತಮ ವಿಷಯವನ್ನಿಟ್ಟುಕೊಂಡು ಕಥೆ ಬರೆದು ಬಿಡಬಹುದು. ಆದರೆ ಪತ್ತೇದಾರಿ ಕಥೆಗೆ ಹಾಗಲ್ಲ. ಹೇಗಾದರೂ ಬರೆದರಾದೀತು ಅನ್ನುವಂತಿಲ್ಲ. ಮೊದಲ ಪ್ಯಾರಾದಿಂದಲೇ ಓದುಗರನ್ನು ಹಿಡಿದಿಡುವ ಕುಶಲತೆ ನಮಗಿರಬೇಕು.

ಉದಾ : ವಿಶಾಲವಾದ ಸ್ನಾನಗೃಹದ ಬಕೇಟಿನಲ್ಲಿದ್ದ ಬಿಸಿ ನೀರಿನಿಂದ ಎದ್ದ ಹಬೆ ಆ ಸ್ನಾನದ ಕೋಣೆಯನ್ನು ಪೂರ್ತಿಯಾಗಿ ಮಂಜಿನಂತೆ ಆವರಿಸುತ್ತಿತ್ತು. ಎದುರಿನ ಗೋಡೆಯಲ್ಲಿದ್ದ ನಿಲುವುಗನ್ನಡಿಯ ಮೇಲೆ ಮಂದ್ರವಾಗಿ ಹಬೆ ಅಂಟಿಕೊಂಡು ಸ್ನಾನಕ್ಕಿಳಿದಿದ್ದ ನಿತ್ಯಾಳ ಸುಂದರವಾದ ನಗ್ನ ದೇಹಕ್ಕೆ ತಾನೇ ಉಡುಗೆಯಾದಂತೆ ಭಾಸವಾಗುತ್ತಿತ್ತು. ಇದ್ಯಾವುದರ ಅರಿವೇ ಇಲ್ಲದ ಹದಿನೆಂಟರ ತರುಣಿ ನಿತ್ಯಾ ತನ್ನಷ್ಟಕ್ಕೆ ತಾನು ಸ್ನಾನ ಮುಗಿಸಿ ಆ ಕನ್ನಡಿಯಿಂದ ಎರಡಡಿ ದೂರ ನಿಂತು ಅದರಲ್ಲಿ ಮಂಜು ಮಂಜಾಗಿ ಗೋಚರಿಸುತ್ತಿದ್ದ ತನ್ನ ನಗ್ನ ಪ್ರತಿಬಿಂಬವನ್ನೇ ನೋಡುತ್ತಾ ಮೈ ಒರೆಸಿಕೊಳ್ಳತೊಡಗಿದಳು. ತನ್ನ ಸೌಂದರ್ಯವನ್ನು ತಾನೇ ಸವಿಯಲೋ, ಅಥವಾ ಮೊದಲೇ ಚಂದಿರನಷ್ಟು ಬೆಳ್ಳಗಿರುವ ತನ್ನ ದೇಹ ಬಿಸಿ ನೀರಿನ ಕಾರಣಕ್ಕೆ ಇನ್ನೆಷ್ಟು ಕೆಂಪಾಗಿದೆಯೋ ಎಂದು ತಿಳಿದುಕೊಳ್ಳಲೋ ಎಂಬಂತೆ ಒಮ್ಮೆ ಆ ಕನ್ನಡಿಯತ್ತ ನಡೆದು ಅದನ್ನು ತನ್ನ ಕೈಯಿಂದ ಒರೆಸಿದಳು. ಹಾಗೆ ಒರೆಸುತ್ತಿದ್ದವಳು ಆ ಕನ್ನಡಿಯಲ್ಲಿ ಕಂಡ ಅವಳ ಹಿಂದಿನ ದೃಶ್ಯವನ್ನು ನೋಡಿ ಕಿಟಾರನೆ ಕಿರುಚಿಕೊಂಡಳು.

ಈ ರೀತಿ ಒಂದು ಕಥೆಯನ್ನು ನೀವು ಪ್ರಾರಂಭಿಸಿದಿರಾದರೆ ಕಂಡಿತಾ ಮೊದಲ ಹೆಜ್ಜೆ ಸರಿಯಾಗಿಯೇ ಇರಿಸಿದ್ದೀರೆಂದಾಯ್ತು. ಏಕೆಂದರೆ ಯಾವ ಓದುಗನೂ ಅವಳು ಏಕೆ ಹಾಗೆ ಕಿರುಚಿಕೊಂಡಳು ಎಂದು ತಿಳಿದುಕೊಳ್ಳಲು ಎರಡನೇ ಪ್ಯಾರಾವನ್ನು ಓದದೇ ಇರಲಾರ. ಹೀಗೆ ಒಂದಾದ ನಂತರ ಒಂದರಂತೆ ಪ್ಯಾರಾವನ್ನು ಓದಿಸಿಕೊಂಡು ಹೋಗುವಂತದ್ದೇ ಪತ್ತೇದಾರಿ ಕಥೆಯ ಮೊದಲ ಲಕ್ಷಣ. ಅದನ್ನು ಸಾಧಿಸುವುದು ಅಷ್ಟು ಸುಲಭವೇನಲ್ಲ.

ವಿಷಯದ ಆಯ್ಕೆ

ಪತ್ತೇದಾರಿ ಕಥೆಗಳಿಗೆ ಸೂಕ್ತ ವಿಷಯವನ್ನು ಆಯ್ಕೆ ಮಾಡುವುದೇ ಒಂದು ದೊಡ್ಡ ಸವಾಲು. ಒಂದು ಕೊಲೆಯ ವಿಷಯವನ್ನು ತೆಗೆದುಕೊಂಡು ಕಥೆ ಬರೆಯುವುದು ಉತ್ತಮ.ಯಾವುದೋ ಒಬ್ಬ ಮುಖ್ಯ ವ್ಯಕ್ತಿಯ ಕೊಲೆ ನಡೆದಲ್ಲಿಂದ ಹಿಡಿದು, ಇನ್ಸ್‌ಪೆಕ್ಟರ್ ಅಥವಾ ಖಾಸಗಿ ಪತ್ತೇದಾರ ಕೊಲೆಗಾರನ್ನನು ಹಿಡಿದು ಹಾಕುವಲ್ಲಿಗೆ ಕ್ಲೈಮ್ಯಾಕ್ಸ್ ಕೊಡಬಹುದು. ಆದರೂ ಈಗಾಗಲೇ ಬಂದಿರುವ ಸಾವಿರಾರು ಕಥೆಗಳಿಗಿಂತಲೂ ವಿಭಿನ್ನವಾಗಿ ಬರೆಯುವುದು ಕಷ್ಟ. ವಿಶಾಲ ವಿವರಣೆಯ ಅವಕಾಶವಿರುವ ಕಾದಂಬರಿಯಲ್ಲಾದರೆ ಬೇರೆ ಬೇರೆ ಮಗ್ಗುಲುಗಳನ್ನು ವಿವರಿಸುತ್ತಾ ಹೋಗಬಹುದು. ಆದರೆ ಕಥೆಯಾದರೆ ಆದಷ್ಟು ಬೇಗ ಅದನ್ನು ಮುಗಿಸಿ ಸಂಪಾದಕರು ಒಪ್ಪುವ ಪುಟಗಳಲ್ಲೇ ಕೊಲೆಗಾರನನ್ನು ಹಿಡಿದು ಹಾಕಬೇಕು... ಹಾಗೂ ಕಥೆ ವಿಭಿನ್ನವಾಗಿರಬೇಕು. ಕಥೆ ವಿಭಿನ್ನವಾಗಿರಬೇಕು ಅಂದಾಗ ಕೊಲೆಯೂ ಕೂಡಾ ವಿಭಿನ್ನವಾಗಿರಲೇ ಬೇಕು.

ಇದರಲ್ಲಿ ಎರಡು ವಿಧ :

1. ಕೊಲೆ ಸಾಧಾರಣ ರೀತಿಯಲ್ಲಿ ನಡೆದಿದ್ದು ಕೊಲೆಗಾರ ಯಾರೆಂದು ಪತ್ತೆ ಮಾಡುವುದು.

2. ಕೊಲೆ ನಡೆದ ರೀತಿಯೇ ವಿಶಿಷ್ಠವಾಗಿದ್ದು (ಆತ್ಮಹತ್ಯೆಯಂತೆಯೋ, ಅಪಘಾತದಂತೆಯೋ ಇದ್ದು) ಅದನ್ನು ಕೊಲೆ ಎಂದು ನಿರೂಪಿಸಿ ಕೊಲೆಗಾರನನ್ನು ಹಿಡಿಯುವುದು.

ಹೀಗೆ ಯಾವುದನ್ನೇ ಆದರೂ ಎಚ್ಚರಿಕೆಯಿಂದ ನಿರೂಪಿಸಬೇಕಾಗುತ್ತದೆ.

ನಿರೂಪಣೆ ರಸವತ್ತಾಗಿರಲಿ

ಪತ್ತೇದಾರಿ ಕಥೆಗಳಿಗೆ ನಿರೂಪಣೆ ಅತ್ಯಂತ ಮುಖ್ಯವಾದ ಅಂಶ. ಬೇರೆ ಕಥೆಗಳಂತೆ ಏನೇನೋ ಹೇಳುತ್ತ ಎಳೆದುಕೊಂಡು ಹೋಗುವಂತಿಲ್ಲ. ಹೇಳಬೇಕಾದ್ದನ್ನು ಮಾತ್ರ ಸ್ಫುಟುವಾಗಿ ಹೇಳಬೇಕು, ಮತ್ತು ಹೇಳಬೇಕಾದ್ದನ್ನೆಲ್ಲಾ ಹೇಳಲೇ ಬೇಕು. ಕಥೆಯನ್ನು ವೇಗವಾಗಿ ಓಡಿಸಬೇಕು. ಅಗತ್ಯ ಇಲ್ಲದೇ ಏನೇನನ್ನೋ ಹೇಳುತ್ತ ಕೂರಬಾರದು. ಉದಾಹರಣೆಗೆ ಕೆಲವು ಕಥೆಗಾರರು ವಿನಾಕಾರಣ ಆ ಕೋಣೆಯಲ್ಲಿ ಒಂದು ಟಿಫಾಯಿ. ಅದರ ಮೇಲೆ ನಾಲ್ಕು ಪತ್ರಿಕೆಗಳು. ಒಂದು ದೊಡ್ಡ ಮಂಚ. ಸೋಫಾ ಸೆಟ್, ಎರಡು ಕುರ್ಚಿ... ಹೀಗೆ ಏನೇನೋ ಹೇಳುತ್ತಾ ಹೋಗುತ್ತಾರೆ. ಕಥೆಗೆ ಅಗತ್ಯ ಇದ್ದಲ್ಲಿ ಮಾತ್ರ ಇಂತಹ ವಿವರಣೆ ಬೇಕು. ಅತ್ಯಂತ ವಿಶಾಲವಾದ ಆ ಕೋಣೆ ಶ್ರೀಮಂತಿಕೆಯಿಂದ ಕೂಡಿತ್ತು. ಅಂದರೆ ಓದುಗರಿಗೆ ಅರ್ಥವಾಗಿ ಹೋಗುತ್ತದೆ. ಅಲ್ಲಿ ಏನೇನು ಇದ್ದಿರಬಹುದು ಎಂದು. ಎಲ್ಲವನ್ನೂ ವರ್ಣಿಸುವ ಅಗತ್ಯ ಇಲ್ಲ. ಹಾಗೆಯೇ ಕಥೆಯ ಕೊನೆಯಲ್ಲೆಲ್ಲೋ ಒಂದು ವಸ್ತು ಆ ಕೋಣೆಯಲ್ಲಿ ಇದ್ದಿರಬೇಕಾದ ಅಗತ್ಯ ಬರುತ್ತದೆಂದರೆ ಅದನ್ನು ಇಲ್ಲಿ ತೋರಿಸಿರಬಹುದು.

ಕಥೆಯನ್ನು ತುಂಬಾ ಭೀಭತ್ಸವಾಗಿ ಬರೆಯಬಾರದು. "ಅಲ್ಲಿ ಸುಮಾರು ಆರು ಲೀಟರ್ ರಕ್ತ ಚೆಲ್ಲಿತ್ತು. ಎರಡು ಲೀಟರ್ ಕೆಂಪಗೆ ಹಾಸಿಗೆ ಮೇಲೂ, ಉಳಿದ ನಾಲ್ಕು ಲೀಟರ್ ನೆಲದಲ್ಲೂ ಹೊಳೆಯಂತೆ ಹರಿದು ಹೋಗಿತ್ತು. ಹೃದಯ ಕಿತ್ತು ಹೊರಗೆ ಬಿದ್ದು ವಿಲ ವಿಲ ಒದ್ದಾಡುತ್ತಿತ್ತು. ಒಂದು ಕಾಲು ಸುಟ್ಟು ದೂರ ಬಿದ್ದಿತ್ತು. ಅದರ ಮೇಲೆ ನೊಣಗಳು ಹಾರಾಡುತ್ತಿದ್ದವು." ಎಂಬಂತೆ ವರ್ಣಿಸಬಾರದು. ಇಂತಹ ಕಥೆಗಳನ್ನು ಓದಿ ಓದುಗರು ಮೂರ್ಛೆ ಹೋದರೂ ಹೋಗಬಹುದು.

ಆಹ್ಲಾದತೆ ಮತ್ತು ಕುತೂಹಲ

ಓದುತ್ತಾ ಹೋದಂತೆ ಓದುಗ ಆಹ್ಲಾದಗೊಳ್ಳಬೇಕು ಮತ್ತು ಮುಂದೇನು ಎಂದು ಕುತೂಹಲಗೊಳ್ಳಬೇಕು. ಪತ್ತೇದಾರಿ ಕಥೆಗಳಲ್ಲಿ ಶೃಂಗಾರ ಸಾಮಾನ್ಯ. ಅದನ್ನು ಅಗತ್ಯಕ್ಕೆ ತಕ್ಕಂತೆ, ಅಧಿಕವೂ ಆಗದಂತೆ ಬಳಸಿಕೊಳ್ಳುವ ಜಾಣ್ಮೆ ನಮಗಿರಬೇಕು. ಅಗತ್ಯಕ್ಕೆ ತಕ್ಕಂತೆ ಹೆಣ್ಣಿನ ಸೌಂದರ್ಯವನ್ನು ವರ್ಣಿಸಿ ಓದುಗರನ್ನು ಖುಷಿ ಪಡಿಸುವುದನ್ನೂ ತಿಳಿದಿರಬೇಕು. ಇನ್ನೊಮ್ಮೆ ಈ ಲೇಖನದ ಎರಡನೇ ಪ್ಯಾರಾದಲ್ಲಿ ನೀಡಿರುವ ಉದಾಹರಣೆಯ ಕಥೆ ಓದಿ ನೋಡಿ.. ಅಲ್ಲಿ ಅತಿರೇಕವಾಗದಂತೆ ಶೃಂಗಾರವನ್ನು ನೀಡಲಾಗಿದೆ. ಓದುಗರು ಶೃಂಗಾರದ ರಸಾನುಭವ ಪಡೆಯುತ್ತಿರುವಾಗಲೇ ಏಕಾಏಕಿ ಆತಂಕದ ವಾತಾವರಣ ಸೃಷ್ಟಿಸಲಾಗಿದೆ. ಇದು ಓದುಗರನ್ನು ಹಿಡಿದಿಡುವ ಉಪಾಯ. ಶೃಂಗಾರದ ಹೆಸರಲ್ಲಿ ಹೆಚ್ಚು ಅತಿರೇಕವಾಗಿ ಬರೆಯಬಾರದು. ಏಕೆಂದರೆ ಪತ್ತೇದಾರಿ ಕಥೆಗಳಿಗೆ ಮಹಿಳಾ ಓದುಗರೂ ಹೆಚ್ಚಾಗೇ ಇದ್ದಾರೆ. ಅವರು ಪುಸ್ತಕವನ್ನು ಕೆಳಗಿಡುವ ಅಪಾಯವಿರುತ್ತದೆ. ಆದರೆ ಆಹ್ಲಾದಕರ ಶೃಂಗಾರವನ್ನು ಎಲ್ಲರೂ ಇಷ್ಟ ಪಡುತ್ತಾರೆ. ಪತ್ತೇದಾರಿ ಕಥೆಗಳಿಗೆ ಚೂರು ಮಾತ್ರ ಹೆಚ್ಚು ಶೃಂಗಾರ ಸೇರಿಸಿದರೆ ತಪ್ಪೇನಿಲ್ಲ.

ನಿತ್ಯಾಳ ಹಿಂದೆ ಏನು ಬೇಕಾದರೂ ಇರಬಹುದು. ಒಂದು ಹೆಣ, ಅಪರಿಚಿತ ವ್ಯಕ್ತಿ, ಯಾರದೋ ಕೈ, ದೆವ್ವ, ರಕ್ತ... ಏನಾದರೂ. ಅಂದರೆ ಆತಂಕ, ಕುತೂಹಲ, ಭಯಾನಕ ಹಾಗೂ ಶೃಂಗಾರಮಯ ದೃಶ್ಯಗಳನ್ನು ಒಂದಕ್ಕೊಂದು ಪೋಣಿಸುತ್ತಾ ಹೋಗುವುದೇ ಪತ್ತೇದಾರಿ ಕಥೆಯ ತಿರುಳು.

ಹೆಚ್ಚು ಹೆಚ್ಚು ಓದಿ ತಿಳಿದುಕೊಳ್ಳಿ

ಪತ್ತೇದಾರಿ ಕಥೆಗಳನ್ನು ಬರೆಯಬೇಕೆಂದರೆ ನೀವು ಹೆಚ್ಚು ಹೆಚ್ಚು ಅಂತಹ ಕಥೆ ಕಾದಂಬರಿಗಳನ್ನು ಓದಲೇಬೇಕು. ನಮ್ಮ ಕನ್ನಡದ ಎನ್. ನರಸಿಂಹಯ್ಯ, ಕೌಂಡಿನ್ಯ, ಸಾಸ್ಕಾರ್ತಿ, ಸಿ.ಎಸ್. ರಾವ್, ಜಿಂದೆ ನಂಜುಂಡಸ್ವಾಮಿ, ಜಿ. ಪ್ರಕಾಶ್ ಮುಂತಾದ ಅನೇಕ ಕಥೆಗಾರರು ಪತ್ತೆದಾರಿಕೆಯಲ್ಲೇ ಹೆಸರು ಮಾಡಿರುವವರು. ಷೆರ್ಲಾಕ್ಸ್ ಹೋಮ್ಸ್ ಪಾತ್ರವನ್ನು ಸೃಷ್ಟಿಸಿದ ಸರ್. ಅರ್ಥರ್ ಕಾನನ್ ಡೈಲ್ ಪ್ರಪಂಚಕ್ಕೇ ಚಿರ ಪರಿಚಿತ. ಇವರ ಕಥೆ ಕಾದಂಬರಿಗಳನ್ನು ಓದಬೇಕು. ಹಾಗೆಯೇ ಅಪರಾಧ ಜಗತ್ತಿನ ಅನೇಕ ವಿಷಯಗಳನ್ನು ತಿಳಿದುಕೊಂಡಿರಬೇಕು. ಐ.ಪಿ.ಸಿ. ಸೆಕ್ಷನ್ 302 ಕೊಲೆಗೆ ಸಂಬಂಧಿಸಿದ್ದು ಎಂಬಂತಹ ತಿಳುವಳಿಕೆ ಇರಬೇಕು. ಪೋಸ್ಟ್ ಮಾರ್ಟಮ್ ರಿಪೋರ್ಟ್‌ಗೂ ಪೋರೆನ್ಸಿಕ್ ಲ್ಯಾಬ್ ರಿಪೋರ್ಟ್‌ಗೂ ಇರುವ ವ್ಯತ್ಯಾಸ ಅರಿತಿರಬೇಕು. ಒಬ್ಬ ವ್ಯಕ್ತಿಯ ಸಾವು ವಿಷದಿಂದ ಆಗಿದೆ ಎಂದು ಪೋಸ್ಟ್ ಮಾರ್ಟಮ್ ರಿಪೋರ್ಟ್‌ ಹೇಳಿದರೆ, ಅದು ಯಾವ ವಿಷ, ಎಷ್ಟು ಪ್ರಮಾಣದಿಂದ ಎಂದು ಹೇಳಲು ಪೊರೆನ್ಸಿಕ್ ಲ್ಯಾಬ್ ರಿಪೋರ್ಟ್‌ ಬೇಕಾಗುತ್ತದೆ. ಇಂತಹ ವಿಷಯಗಳ ಅರಿವು ನಮಗಿರಬೇಕು.

ಹಾಗೆಯೇ ಸ್ಥಳಗಳ ಪರಿಚಯವೂ ಇರಬೇಕು. ಕೆಲವೊಂದು ಸ್ಥಳಗಳನ್ನು ನೇರವಾಗಿ ನೋಡದೇ ಹೋದರೂ ಕೇಳಿಯಾದರೂ, ಓದಿಯಾದರೂ, ಟಿವಿಯಲ್ಲಿ ನೋಡಿಯಾದರೂ ತಿಳಿದುಕೊಂಡಿದ್ದರೇನೇ ಆ ಸ್ಥಳದ ಬಗ್ಗೆ ಬರೆಯಬೇಕು. ಅದಿಲ್ಲದೆ ನೀವೊಂದು ದೇಶದ ಕಥೆಯನ್ನು ಬರೆಯುತ್ತಾ ಅಲ್ಲಿ ರೈಲಿನಲ್ಲಿ ನಡೆವ ಒಂದು ಘಟನೆ ಬರೆದಿರೆಂದು ಇಟ್ಟುಕೊಳ್ಳಿ. ಅಲ್ಲಿ ಅಕಸ್ಮಾತ್ ರೈಲ್ವೆ ಹಳಿಯೇ ಇಲ್ಲದೇ ಹೋದರೆ ? ಈ ರೀತಿ ತಪ್ಪಾಗಿ ಬರೆದಿರುವುದು ಓದುಗರಿಗೆ ಗೊತ್ತಾದರೆ ಇವನ್ಯಾರೋ ಪ್ರಪಂಚ ಜ್ಞಾನವಿಲ್ಲದವ ಎಂದುಕೊಂಡು ಬಿಡುತ್ತಾರೆ. ನಾನೊಂದು ಕಾದಂಬರಿಯಲ್ಲಿ ಸಂಜೆ ಗಲ್ಲಿಗೇರಿಸಿದರು ಎಂದು ಬರೆದು ಬಿಟ್ಟಿದ್ದೆ. ನನಗೆ ನಂತರವೇ ತಿಳೀದಿದ್ದು ಸಂಜೆ ಸಮಯ ಯಾರನ್ನೂ ಗಲ್ಲಿಗೆ ಹಾಕುವುದಿಲ್ಲ, ಮುಂಜಾನೆ ಸೂರ್ಯ ಮೂಡುವ ಮುನ್ನ ಅದನ್ನು ಮಾಡುತ್ತಾರೆ ಎಂದು. ವಿಷಯ ಜ್ಞಾನವಿಲ್ಲದೇ ಬರೆಯಲು ಹೋದರೆ ಇಂತಹ ಎಡವಟ್ಟುಗಳಾಗಿ ಬಿಡುತ್ತವೆ. ಲೇಖಕರು ಆದಷ್ಟೂ ಜಾಗೃತೆ ವಹಿಸಬೇಕು.

ಒಬ್ಬ ಕಥಾ ನಾಯಕನನ್ನು ಸೃಷ್ಟಿಸಿ

ಇದು ಪತ್ತೇದಾರಿ ಕತೆಗಾರರಿಗೆ ತುಂಬಾ ಮುಖ್ಯ. ಷೆರ್ಲಾಕ್ಸ್ ಹೋಮ್ಸ್ ಎಂದರೆ ಆತ ಕಾನನ್ ಡೈಲ್ ಅವರ ಕಥಾನಾಯಕ ಎಂದು ಎಲ್ಲರಿಗೂ ಗೊತ್ತು. ಅದೇ ರೀತಿ ಎನ್. ನರಸಿಂಹಯ್ಯನವರ ಕಥಾನಾಯಕ ಮೃತ್ಯಂಜಯ ಮತ್ತು ಗಾಳೀರಾಯ. ಪತ್ತೇದಾರಿ ಕಥೆ ಓದುವ ಅಭ್ಯಾಸ ಇರುವವರಿಗೆ ಜಿಂಕೆ ಅಂದರೆ ಜಿ. ಪ್ರಕಾಶ್ ನೆನಪಾಗುತ್ತಾರೆ. ಹಾಗೆಯೇ ನಿಮ್ಮದೇ ಒಂದು ನಾಯಕ ಪಾತ್ರವನ್ನು ಸೃಷ್ಟಿಸಿಕೊಳ್ಳುವುದು ಉತ್ತಮ. ಆ ಮೂಲಕ ಓದುಗರನ್ನು ನಿಮ್ಮ ಕಥೆಗಳಿಗಾಗಿ ಹಿಡಿದಿಡಬಹುದು.

ಮೊದಲೇ ನಿರ್ಧರಿಸಿಕೊಳ್ಳಿ ಕ್ಲೈಮ್ಯಾಕ್ಸ್ !

ಇದು ಅತ್ಯಂತ ಮುಖ್ಯ. ನೀವು ಎಷ್ಟೇ ಚೆನ್ನಾಗಿ ಪ್ರಾರಂಭಿಸಿದರೂ, ಎಷ್ಟೇ ಚೆನ್ನಾಗಿ ನಿರೂಪಿಸಿದರೂ ಓದುಗರ ಮನಸಲ್ಲಿ ಕಥೆ ನಿಲ್ಲಬೇಕೆಂದರೆ ಕ್ಲೈಮ್ಯಾಕ್ಸ್ ಅದ್ಬುತವಾಗಿರಲೇ ಬೇಕು. ಯಾವುದನ್ನೂ ಗೊಂದಲಗೊಳಿಸುವಂತಿಲ್ಲ. ಏನೇ ಗೊಂದಲಗಳಿದ್ದರೂ ಅದನ್ನು ಕ್ಲೈಮ್ಯಾಕ್ಸ್ನಲ್ಲಿ ಪರಿಹರಿಸಲೇ ಬೇಕು. ಆರೇಳು ಪುಟಗಳ ಕಥೆ ಮುಗಿದಾಗ ಓದುಗ ನಿಟ್ಟುಸಿರಿಡುವಂತೆ ಇರಬೇಕು.

ನೀವೊಂದು ಕೊಲೆಯ ಕಥೆಯನ್ನು ಬರೆದಿದ್ದರೆ, ಅದು ಹೇಗೆ ? ಯಾಕೆ? ಯಾರಿಂದ ನಡೆಯಿತೆಂಬ ವಿಷಯ ನಿಮಗೆ ಸ್ಪಷ್ಟವಾಗಿ ತಿಳಿದಿರಲೇ ಬೇಕು. ಇಲ್ಲವೆಂದರೆ ಕ್ಲೈಮ್ಯಾಕ್ಸ್ನಲ್ಲಿ ಸೋಲು ಅನುಭವಿಸಬೇಕಾಗುತ್ತದೆ. "ನಾನೊಂದು ಪತ್ತೇದಾರಿ ಕಥೆಯನ್ನು ಅರ್ಧ ಬರೆದಿದ್ದೇನೆ. ಹೇಗೆ ಕೊನೆ ಮಾಡಬೇಕೆಂಬುದೇ ಗೊತ್ತಾಗುತ್ತಿಲ್ಲ" ಎಂದು ಕೆಲವು ಹೊಸ ಕತೆಗಾರರು ಹೇಳುವುದನ್ನು ಕೇಳಿದ್ದೇನೆ. ಇವರು ಅದನ್ನು ಕೊನೆ ಮಾಡಲು ಸಾಧ್ಯವೇ ಇಲ್ಲದಂತೆ ಪ್ರಾರಂಭಿಸಿ ಮುಂದುವರಿದಿದ್ದರೆ ಹೇಗೆ ತಾನೇ ಕೊನೆ ಹಾಡಲು ಸಾಧ್ಯ ?

ಒಬ್ಬ ಕೊಲೆಗಾರ ಕೊನೆಯಲ್ಲಿ ಹೇಗೆ ಸಿಕ್ಕಿ ಹಾಕಿಕೊಳ್ಳುತ್ತಾನೆ ಎಂಬುದನ್ನು ಸರಿಯಾಗಿ ನಿರ್ಧಾರ ಮಾಡಿಕೊಳ್ಳಿ. ಅದಕ್ಕೆ ತಕ್ಕಂತೆ ವಿವರಣೆ ನೀಡುತ್ತಾ ಹೋಗಿ. ಆಗ ಕ್ಲೈಮ್ಯಾಕ್ಸ್ನಲ್ಲಿ ಯಾವುದೇ ಗೊಂದಲ ಆಗುವುದಿಲ್ಲ. ಅದಿಲ್ಲವಾದರೆ ಕಥೆಯನ್ನು ಹೇಗೆ ಹೇಗೋ ನೀರಸವಾಗಿ ಮುಗಿಸಬೇಕಾಗುತ್ತದೆ.

ಪರಿಶೀಲನೆ

ಕಥೆಯೊಂದನ್ನು ಬರೆದಾದ ನಂತರ ಅದನ್ನು ನೀವೇ ಒಂದೆರಡು ಬಾರಿ ಓದಿ ನೋಡಿ. ಪ್ರತಿ ವಿಷಯವನ್ನೂ ಪರಿಶೀಲಿಸಿ. ಬರೆದಿರುವುದು ಏನಾದರೂ ತಪ್ಪಿದೆಯೇ ನೋಡಿ ಸರಿ ಪಡಿಸಿ. ಪತ್ತೇದಾರಿ ಕಥೆ ಓದುವಂತಹ ನಿಮ್ಮ ಸ್ನೇಹಿತರಿಗೆ ಕೊಟ್ಟು ಓದಿಸಿ. ಅವರು ಯಾವುದಾದರೂ ಸಂದೇಹವನ್ನು ವ್ಯಕ್ತ ಪಡಿಸಿದರೆ ಅದನ್ನು ಕಥೆಯಲ್ಲಿ ಯಾವ ಭಾಗದಲ್ಲಿ ಪರಿಹರಿಸಬಹುದೋ ಅಲ್ಲಿ ಒಂದೆರಡು ವಾಕ್ಯಗಳನ್ನು ಅತವಾ ಪ್ಯಾರಾವೊಂದನ್ನು ಸೇರಿಸುವ ಮೂಲಕ ಪರಿಹರಿಸಿ. ಪ್ರಾರಂಭದಲ್ಲಿ ಓದುಗರಲ್ಲಿ ನೀವು ಉಂಟು ಮಾಡಿದ ಗೊಂದಲ, ಅನುಮಾನಗಳನ್ನೆಲ್ಲ ಕ್ಲೈಮ್ಯಾಕ್ಸ್ನಲ್ಲಿ ಪರಿಹರಿಸಲಾಗಿದೆಯಾ ನೋಡಿ. ಒಂದು ಚಿಕ್ಕ ಅನುಮಾನವೂ ಉಳಿಯಬಾರದು. ಹಾಗೆ ನೋಡಿಕೊಳ್ಳಿ.

ಇನ್ನೇಕೆ ತಡ, ಆಸಕ್ತಿ ಇದ್ದರೆ ಈಗಲೇ ಒಂದು ಚಿಕ್ಕ ಕಥೆ ಪತ್ತೇದಾರಿ ಕಥೆ ಬರೆದು ಯಾವುದಾದರೂ ಪತ್ರಿಕೆಗೆ ಕಳಿಸಿ. ಕಥೆ ಪುಟ್ಟದಾಗಿ, ಕುತೂಹಲ ಭರಿತವಾಗಿ ಇದ್ದರೆ ಸಂಪಾದಕರು ಕಂಡಿತಾ ಪ್ರಕಟಿಸುತ್ತಾರೆ.

ಮೂರ್ಛೆ ರೋಗದ ಬಾಲಚಂದ್ರನನ್ನು ಮರ ಹತ್ತಿಸುತ್ತಿದ್ದುದು !

2012-01-26T21:10:00.001+05:30

ನಾವು ಏಳನೇ ತರಗತಿಯಲ್ಲಿ ಓದುವಾಗ ನಮ್ಮ ತರಗತಿಯಲ್ಲಿ ಸರಿಯಾಗಿ ಏಳು ವಿದ್ಯಾರ್ಥಿಗಳಿದ್ದೆವು. ಐದು ಜನ ಗಂಡು ಮತ್ತು ಎರಡು ಜನ ಹೆಣ್ಣು ಮಕ್ಕಳು. ನಾವು ಐದು ಜನರೂ ಬಹಳಾ ಒಗ್ಗಟ್ಟಾಗಿ ಇದ್ದು ನಮಗಿಂತಾ ಕಿರಿಯ ಹುಡುಗರನ್ನು ಚೆನ್ನಾಗಿ ತದುಕಿ ಒಂದು ಹದ್ದುಬಸ್ತಿನಲ್ಲಿ ಇಟ್ಟಿದ್ದೆವು. ನಮ್ಮಲ್ಲೊಬ್ಬ ಗೆಳೆಯ ಬಾಲಚಂದ್ರ. ಅವನಿಗೆ ಮೂರ್ಛೆ ರೋಗ ಇತ್ತು. ಇದ್ದಕ್ಕಿದ್ದಂಗೆ ಪ್ರಜ್ಞೆ ತಪ್ಪಿ ಬಿದ್ದು ಹೋಗುತ್ತಿದ್ದನು. ಹಾಗಾಗಿ ಅವನ ಹಿಂದೆ ಮುಂದೆ ನಾವ್ಯಾರಾದರೂ ಇದ್ದೇ ಇರುತ್ತಿದ್ದವು. ಹೆಚ್ಚಾಗಿ ಪ್ರಾರ್ಥನೆಗೆ ನಿಂತಾಗಲೇ ಅವನು ಬೀಳುತ್ತಿದ್ದುದು.

ಶನಿವಾರ ಶಾಲೆ ಬಿಟ್ಟ ನಂತರ ನಾವು ಸೀದಾ ಮನೆಗೆ ಹೋಗುತ್ತಿರಲಿಲ್ಲ. ಹೋದರೆ ಮುಳುಗಡೆಗೆ ಈಜು ಹೊಡೆಯಲು, ಇಲ್ಲಾಂದರೆ ಬೆಟ್ಟ ಗುಡ್ಡದಲ್ಲಿ ಆಯಾ ಕಾಲಕ್ಕೆ ಸಿಗುವ ಕಾಯಿ, ಹಣ್ಣುಗಳನ್ನು ಕಿತ್ತು ತಿನ್ನಲು ಹೊರಡುತ್ತಿದ್ದೆವು. ಅದು ಎಷ್ಟತ್ತರದ ಮರವಾದರೂ ಸರಿ, ಮುಳ್ಳು ಕಂಟಿಯಲ್ಲಿದ್ದರೂ ಸರಿ, ಬಿಡುತ್ತಿರಲಿಲ್ಲ.

ಮುಳುಗಡೆ ಸಮೀಪದಲ್ಲಿ ನಾಲ್ಕು ತೆಂಗಿನ ಮರಗಳು ಇದ್ದವು. ಅವು ಯಾರಿಗೂ ಸೇರಿದ ಮರಗಳಲ್ಲ. ಹಿಂದೆ ಅಲ್ಲಿ ಇದ್ದು ಲಿಂಗನಮಕ್ಕಿ ಅಣೆಕಟ್ಟು ಆದ ನಂತರ ಊರು ಮುಳುಗಿ ಹೋಗಿದ್ದು, ಅವರೆಲ್ಲಾ ಊರು ಬಿಟ್ಟು ಹೋಗಿದ್ದಾರೆ. ಆದರೇನಂತೆ, ಆ ತೆಂಗಿನ ಮರಗಳಲ್ಲಿ ಹುಲುಸಾಗಿ ಎಳನೀರು ಸಿಗುತ್ತಿತ್ತು. ಆದರೆ ನಾವೆಲ್ಲಾ ಬೇರೆ ಮರಗಳನ್ನು ಸಲೀಸಾಗಿ ಹತ್ತುತ್ತಿದ್ದವಾದರೂ ತೆಂಗಿನ ಮರ ಹತ್ತಲು ಬಾರದು. ಅದು ಬರುವುದು ಬಾಲಚಂದ್ರನೊಬ್ಬನಿಗೇ! ಹಾಗಾಗಿ ಅವನನ್ನೇ ಮರ ಏರಿಸಿ ಕಾಯಿ ಕೀಳಿಸುತ್ತಿದ್ದವು. ಮರ ಏರಿದ ಸಮಯ ಏನಾದರೂ ಮೂರ್ಛೆ ಬಂದರೆ ಗತಿಯೇನು? ಎಂದು ನಾವ್ಯಾರೂ ಯೋಚಿಸುತ್ತಿರಲಿಲ್ಲ. ಮೊದಲಿಗೆ ಅವನೂ ಯೋಚಿಸುತ್ತಿರಲಿಲ್ಲ. ಸರಸರನೆ ಮರವೇರಿ ಕಾಯಿಗಳನ್ನು ಕಿತ್ತು ಕೆಳಗೆಸೆಯುತ್ತಿದ್ದ. ಪುಣ್ಯಕ್ಕೆ ಯಾವತ್ತೂ ಹಾಗೆ ಆಗಲಿಲ್ಲ. ಬಾಲಚಂದ್ರ ಈಗ ಸಾಗರದಲ್ಲಿ ಅಂಗಡಿ ಹಾಕಿಕೊಂಡಿದ್ದಾನೆ.

ತರ್ಲೆ ಬೈರಪ್ಪರ ಸಂಸ್ಕೃತ ರಾಗ

2012-01-23T13:18:00.001+05:30

ತರ್ಲೆ ಬೈರಪ್ಪರಿಗೂ ಸಂಸ್ಕೃತಕ್ಕೂ ಅದೇನು ನಿಕಟ ಸಂಬಂಧವೋ ತಿಳಿದಿಲ್ಲ. ಆದರೆ ಆಗಾಗ ತಮ್ಮ ಸಂಸ್ಕೃತ ಪ್ರೀತಿಯನ್ನು ಕನ್ನಡಿಗರ ಮೇಲೆ ಹೇರುತ್ತಲೇ ಇದ್ದಾರೆ. ಈ ಹಿಂದೆ ಕರ್ನಾಟಕದಲ್ಲಿ ಸಂಸ್ಕೃತ ವಿ.ವಿ. ಆಗಬೇಕು ಎಂದು ಯಡ್ಡಿಗೆ ಫರ್ಮಾನು ನೀಡಿದ್ದರು. ಈಗ ಹೈಸ್ಕೂಲು ಪಠ್ಯದಲ್ಲಿ ಸಂಸ್ಕೃತ ಕಡ್ಡಾಯವಾಗಲಿ ಎಂದು ಹೇಳಿದ್ದಾರೆ. ಅಷ್ಟಕ್ಕೇ ಸುಮ್ಮನಾಗದೇ "ಸಂಸ್ಕತ ಅಧ್ಯಯನ ಮಾಡಿದವರ ಕನ್ನಡ ಗಟ್ಟಿಯಾಗಿರುತ್ತದೆ, ಅವರ ಮಾತು ಸ್ಪಷ್ಟವಾಗಿರುತ್ತದೆ" ಎಂದೆಲ್ಲಾ ಹೇಳಿದ್ದಾರೆ. ಆದರೆ ಕನ್ನಡವನ್ನು ಇವರಿಗಿಂತಲೂ ಸ್ಪಷ್ಟವಾಗಿ ಮಾತನಾಡುತ್ತಿದ್ದ ರಾಜ್‌ಕುಮಾರ‍್ ಅವರು ಸಂಸ್ಕೃತ ಹಾಗಿರಲಿ, ಕನ್ನಡ ಶಾಲೆಗೂ ಸರಿಯಾಗಿ ಹೋದವರಲ್ಲ ಅನ್ನೋದು ಗೊತ್ತಿಲ್ಲವೋ ಏನೋ. ಹಾಗೆಯೇ ಕನ್ನಡದ ಅನೇಕ ಸಾಹಿತಿಗಳು ಹೆಚ್ಚೇನೂ ಓದದೇನೇ ಉತ್ತಮ ಸಾಹಿತ್ಯ ರಚಿಸಿದ್ದಾರೆ. ಇದೇ ಬೈರಪ್ಪರು ಸಹ ಕನ್ನಡದಲ್ಲೇ ಸಾಹಿತ್ಯ ರಚಿಸಿದ್ದೇ ಹೊರತೂ ಸಂಸ್ಕೃತದಲ್ಲಿ ಅಲ್ಲ. ಸಂಸ್ಕೃತ ಈಗಾಗಲೇ ಒಂದು ಐಚ್ಚಿಕ ವಿಷಯವಾಗಿ ಹೈಸ್ಕೂಲಿನಲ್ಲಿ ಇದೆ. ಅದನ್ನೂ ಕಡ್ಡಾಯ ಮಾಡಿ ಮತ್ತೊಂದಿಷ್ಟು ಕನ್ನಡಿಗ ಮಕ್ಕಳು ಅನುತ್ತೀರ್ಣರಾಗುವ ಹಾಗೆ ಮಾಡದಿರಲಿ.